التخطي إلى المحتوى

تعرف غلاتك لو بعد يحتاج ابين اكثر
يالبيك لهاني العمر ما ركزت بيمن مر
يمكن اذا گتلي شكثر تهواني راح اتحير
اليل عدي محبتك بس باچر تزود اكثر
الادري بي من تبتعد مدري شحس بحيرتي
صدري حفر بي خنجر مگطوع شريان ابهر
يندفع شباچ الجفه وبالروح شي تكسر

اشتاگلك
بس الحچي المضموم الك يتبعثر
وبدون موج احتاجلك بالبر وحس بيك البر
مرات ادور الجيتي گبالك سبب يتفسر
وتلمحني احرك الخاتم وابدي ارتبك وتحسر
وهنا تحس بقيمته البس على شوفك يضطر
يفكت عيون الگلب يا ميزتي البيها انغر
مو رايدك واتنفسك لا يا نفس شي اكبر
يا روح ما تطلع مثل روح  التموت من اكبر
اني اعرف بزعلك گبل ما تزعل وياي اگدر
والنوم يتركني وقت ما تنوي عينك تسهر
يا ريت كل هذا الحچي من اگعد گبالك يحضر
ونلتهي بعينك بعد تهمسلي حتى اتذكر
وياك اذا ما سولفت من الصمت لا تحذر
مرات مو كل الحچي يلم المشاعر يگدر
اني آمن التهوا صدگ تتنخه بي من تعثر
روحك علي تتگدر تنشف لحد ما يخضر
لو برد ملگاه تشتعل ورماد خلگك ينذر
وانت اعرف شلون اختنگ من نسمتك تتاخر
اگبل علي روجة عتب وتقرب تكون اخطر
بس ها عتب بس للمثل مو بالزعل تتاثر
تلگاني ناطر روجتك فارش جرف يتعذر
بس انت ردتك من چنت مابين الاحلام افتر
ومادامك بحضن الجفن چف النظر خل يگصر

وياك ابتديت
بدونك شلون ابتدي شتتصور
عنك ردت مرة ابتعد والغيض بفكاري ابحر
وتراجعت بنفس الوقت من حرت بيش اتعطر
يخفت ضواي ومايضل لو شوف الفراگ ابصر
والليل يتشمت هوا بخيط الشمع من يصغر